EWURA YARIDHISWA NA UBORA WA MAFUTA YA DIZELI NA PETROL WILAYANI MBARALI MKOANI MBEYA

MAMLAKA ya Udhibiti wa Huduma za Nishati na Maji nchini, EWURA, imeridhishwa na ubora wa mafuta ya dizeli na petroli yanayouzwa kwenye vituo vya mafuta Wilayani Mbarali mkoani Mbeya. 

EWURA imetoa tathimini hiyo baada ya ukaguzi uliofanywa na Maafisa wake kwenye vituo vya mafuta wilayani humo kubaini kuwa vinauza mafuta yasiyochakachuliwa. 

Ukaguzi huo unafanyika kutokana na malalamiko ya madereva wa magari nchini kuwa baadhi ya vituo vya mafuta vinauza nishati hiyo hasa petrol na dizeli iliyochakachuliwa kwa kuchanganywa na mafuta ya taa, maji au vimiminika vingine na hivyo kuharibu injini za magari yao. 

Katika ukaguzi huo wa dharura wilayani Mbarali, Maafisa wa EWURA walikagua vituo vitatu vilivyomo wilayani humo na kubaini kuwa hakuna mafuta yaliyochakachuliwa yanayouzwa kwa wateja.

Afisa Ukaguzi wa EWURA, Raphael Nyamamu, amesema wameridhishwa na hali hiyo inayoonesha kuwa wafanyabiashara wa mafuta wilayani Mbarali wanafuata sheria za biashara hiyo, kanuni na taratibu zilizowekwa na EWURA katika uzaaji wa nishati hiyo.

Mmoja kati ya wamiliki wa vituo vya mafuta wilayani Mbarali, Suleiman Kilemile, amesema wamejifunza madhara ya kuchakachua mafuta hivyo wapo makini kuhakikisha kuwa hawanunui wala kuwauzia watu mafuta machafu.

EWURA ipo mkoani Mbeya kufanya ukaguzi huo kwenye wilaya zote za mkoani hapa ili kuhakikisha sheria, kanuni na taratibu za uendeshaji wa biashara hiyo zinafuatwa na wafanyabiashara husika.

Mwisho

Je, Una Habari,Picha,Tangazo,Makala, Ushauri n.k.?Basi Wasiliana Nasi Simu/WhatsApp 0759 406 070