WATU 274 WATIWA NGUVUNI NA JESHI LA POLISI MBEYA

Kamanda wa Polisi Mkoa wa Mbeya Ahmed Msangi

Na Jamiimojablog

Jeshi la Polisi Mkoani Mbeya linawashikilia watu 274  kwa tuhuma za kuhusika na vitendo vya vurugu wakati wa utangazaji wa matokeo ya uchaguzi katika majimbo matatu yaliyopo Mkoani hapa.

Akizungumza  na waandishi wa habari ofisini kwake ,Kamanda wa Polisi Mkoa wa Mbeya, Ahmed Msangi,alisema watuhumiwa hao tayari wamefikishwa katika mahakama za mwanzo zilizomo katika Wilaya husika.

Msangi, ameyataja majimbo hayo ni Rungwe, jimbo la Mbozi pamoja na jimbo la Vywawa ambapo maeneo hayo yalionekana kuwepo na viashiria vya wagombea kutokubaliana na matokeo hivyo wafuasi wao kuchukua uamuzi wa kuvunja sheria kwa kuanzisha vurugu.

Amesema,vurugu hizo ziliambatana na uharibifu mkubwa wa mali za umma ikiwemo miundombinu ya barabara.

Aidha, Kamanda Msangi amesema kuwa mbali na uharibifu huo pia vurugu hizo zilisababisha  kutokea hali ya uvunjifu wa amani iliyochangia kwa kiasi kikubwa kuwatia hofu baadhi ya wananchi ambao ni wapenda amani.   

Hata hivyo, Msangi alisema atuhumiwa hao wamefikishwa mahakamani leo kwa makosa tofauti tofauti.

Mwisho.

Je, Una Habari,Picha,Tangazo,Makala, Ushauri n.k.?Basi Wasiliana Nasi Simu/WhatsApp 0759 406 070