CHAMA CHA SOKA MKOANI MBEYA ,MREFA CHAUTUPIA MZIGO UONGOZI MBEYA CITY SUALA LA TIKETI BANDIA

Mwenyekiti chama cha Mpira wa Miguu Mkoani Mbeya (MREFA)Ndugu Elias Mwanjala.

Na mwandishi wetu,mbeya

CHAMA cha Soka mkoani Mbeya, MREFA, kimekanusha viongozi wake kuhusika na tuhuma za uingizaji wa tiketi bandia kwenye michezo ya Ligi Kuu ya soka Tanzania Bara katika uwanja wa Kumbukumbu ya Sokoine mkoani humo.

Hatua hiyo ya MREFA, inafuatia tuhuma zilizotolewa na uongozi wa timu ya Mbeya City kuwa baadhi ya viongozi wa chama hicho wanahujumu mapato uwanjani hapo kwa kushiriki vitendo vya uingizaji wa tiketi bandia kwenye mauzo wakati wa michezo ya timu hiyo.

Akizungumza na Waandishi wa habari, Mwenyekiti wa MREFA, Elias Mwanjala, amesema hakuna kiongozi wa chama hicho anayejihusisha na vitendo hivyo bali yaliyopo ni madai yasiyokuwa na ukweli kutoka kwa viongozi wa Mbeya City.

Mwanjala, amesema licha ya viongozi wa Mbeya City kumtajia majina ya baadhi ya viongozi wa MREFA wakidai ndiyo wahusika wa vitendo hivyo lakiini hakuna ushahidi wowote kuwa wanahusika na tuhuma hizo.

Uongozi wa Mbeya city kupitia kwa Katibu wake, Emmanule Kimbe, ulidai kuwa baadhi ya viongozi wa MREFA wanaongoza vitendo vya uingizaji wa tiketi bandia uwanjani hapo.

Kimbe, alidai licha ya kuwakataa viongozi hao kuwa ni chanzo cha kuhujumu mapato kwenye uwanja wa kumbukumbu ya Sokoine lakini bado wanaendelea kuratibu masuala ya tiketi uwanjani hapo hali ambayo inawakatisha tamaa kuwa chama hicho kinawakumbatia watu wasio waaminifu katika mapato.

Malumbano baina ya pande hizo yameshika kasi zaidi hasa baada ya Mbeya City kudai kuwa tiketi bandia zaidi ya 500 ziliingizwa kwenye mauzo ya mchezo baina yake na Simba  Februari 15 mwaka huu uwanjani hapo ingawa TFF kupitia kwa Afisa Mtendaji Mkuu wa Bodi ya Ligi, Silas Mwakibinga, imeshafafanua kuwa tiketi hizo si bandia bali zilisahauliwa wakati wa zoezi la kupiga mihuri vitabu vya tiketi za mchezo huo.

Mbeya City inaendelea kupinga taarifa hizo kwa maelezo kuwa haiwezekani tiketi zote 500 zilizotokana na vitabu vitano kusahaulika na wapiga mihuri wote walioshiriki zoezi hilo kutoka timu zote za Simba na Mbeya City.

Mwisho 

 

                                                                                                                        Picha na Maktaba              

Je, Una Habari,Picha,Tangazo,Makala, Ushauri n.k.?Basi Wasiliana Nasi Simu/WhatsApp 0759 406 070