MWENYEKITI WA KIJIJI KYELA MBEYA ASAKWA KWA KUINGIZA WAHAMIAJI HARAMU NCHINI

Kamanda wa Polisi Mbeya Ahmed Msangi

 Na Emanuel Madafa,Mbeya

Licha ya serikali kuendelea kupambana na Vitendo vya uhamiaji haramu Nchini  mkakati huo unaonyesha kukwamishwa na baadhi ya watendaji wa serikali.

Hatua hiyo inakuja kufuatia malalamiko toka kwa wananchi Wilayani Kyela Mkoani Mbeya kuwa lalamikia baadhi ya watendaji kuwa wamekuwa wakiwahifadhi wahamiaji haramu kinyume cha sheria.

Wakizungumza na Blog hii wakazi wa  wa Kata ya Katumba Wilayani Kyela, wamesema kukithiri kwa vitendo vya wahamiaji haramu Mkoani Mbeya kumechangiwa na baadhi ya watendaji wa serikali ambao wamekuwa wakiwapokea na kuwahifadhi.

Wamesema, viongozi hao wamekuwa wakiwasafirisha  wahamiaji hao licha ya serikali kutumia gharama kubwa ya kupambana na wimbi hilo la watu wanaoingia nchini kinyume cha taratibu.

Wakizungumzia  tukio la kukamatwa kwa raia saba kutoka nchini Ethiopia lililotokea Mei 14 mwaka huu majira ya saa 8:30 katika kijiji  cha Katumba Songwe Wilayani Kyela ambalo linadaiwa kuhusisha viongozi wa serikali.

           

Wamesema,wahamiaji hao waliingia nchini kwa kupokelewa na kuhifadhiwa na kiongozi  mmoja wa serikali Wilaya ya Kyela (jina limehifadhiwa).

Habari za uhakika zinaeleza kuwa kiongozi huyo amekuwa akijihusisha na vitendo hivyo kwa muda mrefu hali iliyoshindwa kuvumiliwa na wananchi na kuamua kumtaja hadharani.

Katika taarifa iliyotolewa jana na jeshi la polisi mkoani Mbeya kwa vyombo vya habari ilieleza kuwa jeshi hilo linamtafuta mtu mmoja ambaye hata hivyo halikumtaja jina kwa tuhuma za  kuwahifadhi wahamiaji haramu saba.

Kamanda wa polisi mkoa wa Mbeya, Ahmed Msangi, alisema raia hao saba kutoka nchini Ethiopia walikamatwa wakiwa wamehifadhiwa na mtu huyo baada ya kupokea taarifa za raia wema.

Aliwataja raia hao  haramu kuwa  ni Michael Solomon (45) 2, Abebe Isako (24), Adise Mashone (20) , Abraham Maniko (20) , Ocee Watino (26),Abraham Ganduu (24) , Agram Gandule (26).

“Taratibu zinafanywa ili wakabidhiwe idara ya uhamiaji kwa hatua zaidi, aidha jeshi la polisi  linaendelea kumtafuta mtu aliyewahifadhi wahamiaji hao ambae jina lake tunalihifadhi.” alisema.

Takribani miaka mitano sasa kumekuwa na wimbi kubwa la wahamiaji haramu kutoka nchi za Ethiopia, Somalia, Burundi, Rwanda na Jamuhuri ya kidemokrasia ya Kongo wamekuwa wakiitumia Tanzania kama mapito ya kuelekea nchi za kusini mwa Afrika kusaka maisha bora.

Mwisho.

Moja wa Kundi la wahamiaji haramu wakiwa chini ya Ulinzi

Je, Una Habari,Picha,Tangazo,Makala, Ushauri n.k.?Basi Wasiliana Nasi Simu/WhatsApp 0759 406 070