MKUU WA WILAYA YA RUNGWE ADAIWA KUTAWALA KIMABAVU >>>>SOMA HAPA

Mkuu wa Wilaya ya Rungwe Krispin Meela

Na Mwandishi wetu ,Rungwe

MVUTANO wa kimaslahi unaoendelea katika Shule ya Sekondari ya watoto yatima ya Mwaji, juu ya nani muazilishi wa shule hiyo, iliyopo Wilayani Rungwe Mkoani Mbeya, umechukua sura mpya baada ya serikali ya Wilaya kudaiwa kumpiga marufuku mmoja wa kiongozi ambaye inasemekana ni muazilishi halali wa shule hiyo kutokanyaga katika eneo hilo.

Sambamba na muazilishi huyo kuzuiwa kufika kwenye eneo hilo, pia serikali hiyo imewaondoa watoto yatima zaidi ya 60 kutoka Wilaya mbalimbali za Mkoa wa Mbeya, kuendelea kupata elimu katika shule kutokana na sababu ambazo hazijawekwabayana katika uongozi wa shule hiyo.

Hatua hiyo imetajwa kuwaathiri walezi wa watoto hao,ambao wengi wao wameachwa na wazazi hivyo kulelewa na ndugu na jamaa ambapo kiuchumi hawako vizuri hivyo kuitegemea shule hiyo ambayo imekuwa ikipokea misaada kutoka nchini Marekani.

Elifa Mwakatobe, ni mwanzilishi na mmiliki wa shule ambaye Mkuu wa Wilaya ya Rungwe, Chrispine Meela , amempiga marufuku kukanyaga shuleni hapo, alisema yeye ameshangazwa na kauli zinazotolewa na kiongozi ambaye amebeba dhamana ya kuiongoza Wilaya hiyo kuwa na viashiria vya uchochezi na zinazohamasisha vurugu badala ya kutatua tatizo lililopo.

Amesema, Shule hiyo ilianzishwa mwaka 2004 na kupata usajili kutoka Baraza la mitihani mwaka 2013 ikiwa chini ya uazilishi wake kwa kushirikiana na raia kutoka nchini Zambia Marehemu Raphael Fili Mwaji hivyo anashangazwa na hatua ya serikali kumzuia kutofika eneo hilo la shule sambamba na kutoshughulika na jambo lolote linaloihusi shule hiyo.

Akizungumzia sakata hilo Mkuu wa Wilaya ya Rungwe, Meela alikiri kuwepo kwa mgogoro huo na kukanusha madai ya kwamba yeye anamaslahi binafsi ndani ya shule hiyo isipokuwa anasimamia sheria na taratibu katika Wilaya yake.

Alisema, sababu ya kumpiga marufuku kufika shuleni hapo, ni kwamba mama huyo amefungua shule nyingine na kutumia nyaraka za usajili wa shule ya Mwaji kukusanya ada pamoja na michango mbalimbali kutoka kwa walezi, jambo linalodhihirisha kwamba ni tapeli.

Hata hivyo, inadaiwa kuwa Elifa Mwakatobe, aliwahi kuwa Mwenyeikiti wa kikundi cha Bujela ambacho ndicho kinachomiliki shule hiyo ya Mwaji kwa sasa ambayo ipo chini ya shirika la MOP na kwamba alijitoa siku nyingi kabla ya shule hiyo kupata usajili.

Mwisho.