MMOJA AFARIKI DUNIA VURUGU ZA WANANCHI NA JESHI LA POLISI CHUNYA

Mkuu wa Wilaya ya Chunya Rehema Madusa(Picha Maktaba)

Na JamiiMojaBlog,Mbeya 12

Mkazi wa Makongolosi Wilayani Chunya Mkoani Mbeya Ndugu Amoke Mbilinyi (25)amefariki dunia   katika  vurugu zilizotokea  leo   baina ya jeshi la polisi na wananchi katika Mji Mdogo wa Makongolosi Wilayani Chunya Mkoani Mbeya .

Katika vurugu hizo pia askari polisi wanne pamoja na raia watatu wamejeruhiwa kufuatia vurugu hizo ambazo zilidumu kwa zaidi ya masaa8

Mwenyekiti wa Kamati ya Ulinzi na Usalama Wilayani Chunya Ndugu Rehema Madusa ambaye pia ni Mkuu wa Wilaya hiyo amethibitisha kutokea kwa vurugu hizo ambapo amesema  merehemu amefariki dunia wakati akikimbizwa hospital kwa ajili ya kupatiwa matibabu kutokana na kupata majeraha wakati wa vurugu hizo .

Amesema tukio hilo limetokea majira ya saa 4 Desemba 18  asubuhi na limesababisha uharibifu wa mali za jeshi la polisi kwa kuchomwa moto kituo cha Polisi Makongolosi pamoja na kufanya uhalibufu wamiundombinu ya barabara pamoja na askari na  raia kujeruhiwa ambapo majina ya majeruhi hao wote bado hayajafahamika.

Aidha Madusa amesema chanzo cha vurugu hizo ni baada ya kukamatwa kwa watuhumiwa wawili wa mauaji ya mzee mmoja ambaye jina lake halijafahamika ambapo wananchi waliwataka Polisi kuwaachia huru ili wajichukulie sheria Mkononi.

Amesema  Jeshi la Polisi liliendelea kuwashikiria watuhumiwa hao ndipo wananchi walianza kuwashambulia Polisi kwa mawe  sanjali na kufanya uhalibifu mwingine .

Aidha Mkuu huyo wa Wilaya amefika katika tukio hilo na kuzungumza na wananchi ambapo aliwataka kuacha tabia ya kujichukulia sheria Mkononi huku uchunguzi zaidi wa unaendelea kufuatia tukio hilo.

Mwisho.

Je, Una Habari,Picha,Tangazo,Makala, Ushauri n.k.?Basi Wasiliana Nasi Simu/WhatsApp 0759 406 070