ZAHANATI YAFUNGWA WANANCHI WAKOSA HUDUMA KISA MUUGUZI YUPO LIKIZO CHUNYA

Mkuu wa Wilaya Chunya Deodatus Kinawilo

Hii ndio Zahanati iliyofungwa kutokana na kutokuwepo kwa mtoa huduma Katika Kijiji cha Gua Kata ya Gua Wilayani Chunya Mkoani Mbeya.

Na EmanuelMadafa,Mbeya

WANANCHI wa Kata ya Gua iliyopo Wilayani Chunya, Mkoani Mbeya, wameilalamikia serikali kwa kushindwa kupeleka watumishi kwenye  Zahanati ya afya hali iliyopeleka kufungwa kwa jengo hilo na wao kukosa huduma.

Zahanati hiyo imefungwa kwa zaidi ya mwezi mmoja kwa kile kinachosemekana mkunga aliyekuwepo kwenda likizo ya mapumziko.

Wakizungumza na Blog hii   hii wakazi wa Kijiji cha Gua Kata ya Gua, walisema  huduma kwenye Zahanati hiyo ilianza kusuasua  kuanzia mwezi January mwaka huu na ulipofika mwezi February ndipo waliposhangaa kuona jengo hilo limefungwa.

“Kipindi cha nyuma  huduma ilikuwa ikitolewa kwa kusuasua, lakini  hivi karibuni ndio tumeshangaa kukuta jengo hili likiwa limefungwa na tulipofuatilia  kwenye uongozi wa serikali ya kijiji tumeambiwa kuwa muuguzi aliyekuwepo ameenda mapumziko,”alisema Krispin Mikael mkazi wa Gua.

Amesema, awali  Zahanati  hiyo ilikuwa na mganga aliyetajwa kwa jina moja la Semwenza ambaye alistaafu na kijiji kukaa zaidi ya miaka miwili bila ya mganga  hivyo kuendeshwa na mkunga tu.

Amesema,  tatizo kubwa ni pale mkunga huyo anapopatwa na matatizo pamoja na kuchukua likizo ya mapumziko hivyo jengo hilo la Zahanati hufungwa na kumsubili mpaka siku atakapo rejea ofisini.

Amesema imefika wakati wanajiona kama wao sio watanzania kutokana na kuwepo kwa hali hiyo

Amesema, katika kipindi chote  hicho   wagonjwa  huendelea kuteseka kwa kutembea umbali mrefu kwenda kutafuta huduma na wengine huishia kwa waganga wa kienyeji.

Amesema,  baadhi ya wagonjwa hukimbilia  kwa waganga wakienyeji kutibiwa  ambao wengi wao hutumia ramli za uchonganishi na kusababisha migogoro isiyokuwa na ulazima ndani ya jamii.

Aidha, jitihada za  kumtafuta Mwenyekiti wa Kijiji hicho kwa nia ya kupata maelezo ya jambo hilo ziligonga mwamba baada ya kuelezwa kuwa kiongozi huyo alikuwa amesafiri kikazi.

Mkurugenzi Halmashauri ya Chunya Sophia Kumbuli ambaye  aliahidi kulifanyia kazi tatizo hilo ikiwa ni pamoja na kufika kwenye eneo la tukio.

Mwisho.

Je, Una Habari,Picha,Tangazo,Makala, Ushauri n.k.?Basi Wasiliana Nasi Simu/WhatsApp 0759 406 070