JIJI LA MBEYA LASAFISHA VIBANDA VILIVYOJENGWA KIHOLELA STENDI YA MABASI NANENANE>>>>>TAZAMA HAPA

Baadhi ya wamachinga waliobolewa maeneo yao wakijaribu kuambulia japo misumali tu na nondo

Hawajui chakufanya

Na Emanuel Madafa Mbeya

Wafanyabiashara ndogondogo  ‘Machinga’ waliovamia eneo la NaneNane lililopo Jijini Mbeya na kujenga vibanda vyao, jana  walijikuta kwenye wakati mgumu baada ya halmashauri ya Jiji kuvibomoa vibanda hivyo kutokana na kujengwa kinyume cha sheria.

Eneo hilo , lilitengwa na halmashauri ya Jiji la Mbeya, kwa ajili ya kuwaweka wamachinga zaidi ya 800 waliokuwa wakiendesha shughuli zao kwenye maeneo ambayo yaliyopigwa marufuku, pamoja na wale waliondolewa kwenye eneo la Soko la Mwanjelwa baada ya kuungua moto mwaka 2006.

Machinga walioathirika na oparesheni hiyo ni wale ambao majina yao hayakuingizwa kwenye orodha ya watu watakao nufaika na eneo hilo ambalo limeonyesha kuwa ni kivutio kikubwa kwa biashara ndogondogo kutokana na kuwa karibu na stendi mpya ya mabasi yaendayo mikoani na Wilayani ya Nane Nane.

Katika operesheni hiyo,vibanda zaidi ya 150 vimebomolewa na watendaji wa halmashauri hiyo na kwamba zoezi hilo lilikuwa likiendeshwa chini ya Mwanasheria wa Jiji la Mbeya, Crispin Kaijage.

Kabla ya uongozi wa Jiji, kufikia uamuzi wa kubomoa vibanda hivyo, Baraza la Madiwani lililoketi November 21 mwaka huu, kupitia  wajumbe wake, walitaka kufahamu utaratibu uliotumika wakati wa ugawaji wa eneo hilo baada ya kupokea malalamiko ya kwamba eneo hilo limegaiwa kwa wafanyabiashara wakubwa.

Kutokana na kauli hiyo, Mstahiki Meya wa Jiji la Mbeya, Athanas Kapunga, alimtaka Mkuu wa idara hiyo Vicent Msola kujibu malalamiko hayo, ambaye alikiri wazi kwamba  eneo hilo limevamiwa na watu ambao hawakuwa walengwa.

Mwisho.

Je, Una Habari,Picha,Tangazo,Makala, Ushauri n.k.?Basi Wasiliana Nasi Simu/WhatsApp 0759 406 070